الحلقة الرابعة هنتغير بجد

السلام عليكم ورحمة الله وبركاته
من بعد الدرس التالت
وانا قاعد مستني
ايه هي الحاجة اللي هتبعدني عن النار
عارف ليه
لان من ابعد عن النار وادخل الجنة فقد فاز
الواحد مننا يعوز ايه اكتر من ان ربنا يعتقه من النار
{كُلُّ نَفْسٍ ذَآئِقَةُ الْمَوْتِ وَإِنَّمَا تُوَفَّوْنَ أُجُورَكُمْ يَوْمَ الْقِيَامَةِ فَمَن زُحْزِحَ عَنِ النَّارِ وَأُدْخِلَ الْجَنَّةَ فَقَدْ فَازَ وَما الْحَيَاةُ الدُّنْيَا إِلاَّ مَتَاعُ الْغُرُورِ }آل عمران
سبحان الله عارفه قريت الاية دي كتير واول مرة ابص ليه صح واتمتع بيها
اول حاجة في الاية دي اكتشفتها النهاردة
ان كل نفس هتموت طيب لما هموت ليه اكوش علي الدنيا كلها
لما هموت ليه اظلم الناس واسرق واجمع فلوس حرام واسيبها لغيري يتمتع بيها
وزي ما بيقولوا الكفن مالهوش جيوب
تاني حاجة ان الحساب يوم القيامة
وكل واحد يوفي اجره يعني ياخد حقه وافي
عارفين يا شباب زمان كان اللي يعمل ذنب ينكتب علي باب داره
يعني لو قمت الصبح لقيت علي باب بيتك مكتوب
محمود عاكس مرات جاره
ياه علي الفضيحة ياه اللي جاي واللي رايح يتكلم عليك
ومش بعيد يكون جارك جزار يمسك السكينة ويقطعك
وربنا اختص امة محمد بان الكلام ده ما يحصلش فينا
ودي لو عارفين نعمة كبيرة
الحاجة التالتة ملاحظين كلمة زحزح عن النار
يعني الواحد لو كان خلاص هيدخل النار وحد جره ابعده يعني
ده هو الفوز ايوه طبعا
لانك لو مدخلتش النار يبقي هتدخل الجنة
واحنا عايزين ايه تاني بعد الجنة
فيها النعيم كله فيها مالا عين رات ولا اذن سمعت ولا خطر علي قلب بشر
مش عايز اقعد اوصف كتير محتاجين دواوين ودواوين
الحاجة ارابعة معاي والا ايه
.......فكروني
اه افتكرت
الحاجة الرابعة ان الحياة الدنيا ما هي الا متاع الغرور
يعني متاع فاني
متاع باطل
ايوة متعة بس مش دايمة
نضرب مثل
يعني انت لو حفظت بصرك عن متعة النظر اللي هي لحظات وتطير
ايه اللي يحصل
ربنا يبدلك زوجات حور عين معاك
من شدة جمالهن تري الماء وهو يسري في عروقهن
ولو ظهر ساق احداهن في الدنيا لانار المشرق والمغرب
قارن يا باشا وقيس براحتك كل امتع الدنيا
ايه الاحسن ليك نظرة فانية والا نعيم دائم
علي العموم مش هطول عليكم علشان سامع اذان العصر
وخايف تفوت علي الاربعين ليلة بتاعت الصلاة
وكمان بحافظ علي السنن القبلية والبعدية للصلوات الخمسة
والقرآن خلاص انا اشتركت في مدرسة
واخر حاجة هي محاسبة النفس ومحتاجة قعدة تاني
{اعْلَمُوا أَنَّمَا الْحَيَاةُ الدُّنْيَا لَعِبٌ وَلَهْوٌ وَزِينَةٌ وَتَفَاخُرٌ بَيْنَكُمْ وَتَكَاثُرٌ فِي الْأَمْوَالِ وَالْأَوْلَادِ كَمَثَلِ غَيْثٍ أَعْجَبَ الْكُفَّارَ نَبَاتُهُ ثُمَّ يَهِيجُ فَتَرَاهُ مُصْفَرّاً ثُمَّ يَكُونُ حُطَاماً وَفِي الْآخِرَةِ عَذَابٌ شَدِيدٌ وَمَغْفِرَةٌ مِّنَ اللَّهِ وَرِضْوَانٌ وَمَا الْحَيَاةُ الدُّنْيَا إِلَّا مَتَاعُ الْغُرُورِ }الحديد20

سلام مؤقت