ابقى سلملي عالديمقراطية

أنا
بكره الاخوان وبحملهم المسئولية[size=16]

أيوة
زى ما بقولكوا كدة
الاخوان همه السبب في كل حاجة بتحصل
دلوقتى في البلد
همه السبب في الفتنة الطائفية
همه السبب في انحراف الحكومة عن
تحقيق آمال الشعب
همه السبب في قرارات المجلس العسكرى
المتخبطة والمتضاربة
همه السبب في تغير موقف النخبة من
نتيجة الاستفتاء وتحايلهم للإلتفاف على رأى صناديق الاقتراع
همه السبب في انهيار نماذج كنت
أعتبرها جميلة ومناضلة ومعتدلة في عهد اللى ما يتسمى

أمثال نهى الزيني وزكريا عبد العزيز
وممدوح حمزة وجورج اسحق
الاخوان همه السبب في الضغوط
الامريكية على المجلس العسكري
وهمه السبب في سحب المعونه
الامريكية
وهمه االسبب في فقر البلد دي وتوقف
الانتاج والثورة المضادة والفتنة الطائفية وانتشار البلطجة وترويع الآمنين
وهمه السبب في التلوث الاشعاعي اللى
جايلنا من اليابان
والاحتباس الحراري وثقب الاوزون
كمان

وأهم المصايب اللى هيدبسونا فيها

انهم هيكونوا السبب في المحاولات
المستمية لكل الاحزاب وضغطهم على المجلس العسكري لتأجيل موعد الانتخابات
وتوريطنا في المجلس العسكري كحاكم للبلاد
ودي مش ممكن نسامح فيها أبدا

أعتقد أن الأنسب للشعب الآن أن
الاخوان يتحولوا الى جماعة محظورة زي ما كانوا
بلا ديمقراطية بلا بتاع

طبعا
لولا انهم هيشاركوا في الانتخابات
مكانوش شباب ماسبيوا اتهبلوا علينا وبدأوا في فرض شروطهم وتمسكوا بإلغاء المادة
التانية من الدستور
طبعا مش الحكومة اللى جاية هتبقى
اخوانجية؟؟؟؟
وأكيد هيستغلوا المادة التانية
لصالحهم ويفعلوها

وقرارات الحكومة البطيئة كما لو
كانت بتعمل حسابها في كل خطوة للإخوان؟؟؟؟؟
وقوانين الحرية السياسية والاحزاب
اللى متفصلة عالمقاس عشان تضيقها عليهم وعلينا؟؟؟؟
وتأجيل انتخابات نقابة المهندسين؟؟

طبعا عشان اللى هيفوز فيها همه الاخوان...أصلها مش جديدة عليهم

واتحاد العمال ومشاكله؟؟ وعدم
انتخاب اتحاد عمال محترم؟؟
أكيد عشان الاخوان متربصين للدخول فيه
وأكيد هيفوزوا في انتخاباته النظيفة

طيب حد يفهمني.. ليه الحكومة ملغتش
البؤرة المتعفنة والسرطان المدمر المسمى بالمجالس المحلية رغم مطالبات الشعب من
اول التنحي؟؟؟؟
طبعا لأن الاخوان موعدوش انهم
هيشاركوا في الانتخابات المحلية بجزء من المقاعد كما وعدوا في مجلس الشعب
يعنى ممكن نلاقي مجلس محلي كله من
الاخوان
وبانتخابات نزيهه بردوا
شفتوا عملتوا فينا ايه يا اخوان؟؟؟

أهه بسببكوا مش هيوقفوا المحليات

والأشد والأنكى
تحويل لواءات أمن الدولة الى العمل
في الأمن الوطني
أيوة طبعا
علشان همه أكتر ناس فاهمينكم
وبيعرفوا يتعاملوا معاكم
تصوروا لو مفيش اخوان
أكيد كان أمن الدولة هيتحل...لأنه
مكانش هيكون له لازمة
يعنى هيشتغل على مين غيركوا؟؟؟؟
وتخيلوا لو مفيش خيرت الشاطر مكنش
ساويرس هيتحفنا كل يوم بقناة جديدة وحزب جديد ويرش فلوس بالهبل معرفش جايبها
منين على احزاب ملهاش قاعدة شعبية ومش ممكن تفوز في الانتخابات

ولو مفيش اخوان كان المجلس العسكرى اتهد وقعد يشوف شغله في هدوء بعيدا عن
الاضواء
وكان راضى كل الناس وكل الاحزاب
لأنهم مش بتوع مشاكل زى الاخوان
لا وكنا هنبقى مرتاحين آخر راحة لأن
كل قرارات ومراسيم المجلس أكيد في صالحنا

لا والنخبة هتبقى مرتاحة ومطمئنة..
ومش هتستفز الشعب ولاتتحدى ارادته ومكنتش هترمي اختياره في صندوق الزبالة علشان
تفرض رأيها بمؤتمرات الخمس نجوم اللى ميعرفش عنها حاجة الناس الغلابة اللى نزلت
الاستفتاء عشان تقول نعم

لو مفيش اخوان كانت لجنة تأسيس
الدستور هيكونها مجلس الشعب المنتخب لأنه ساعتها مكانش هيبقى فيه حد من الاخوان

لو مفيش اخوان... يبقى مفيش يحيي
الجمل
ساعتها مكنش هيبقى له لازمه انه
يدخل الحكومة

لو مفيش اخوان كانوا المناضلين
المعتدلين ضد النظام السابق هيفضلوا على صورتهم الجميلة في عيون الناس
من أمثال نهى الزيني وزكريا عبد
العزيز وممدوح حمزة
وماكانوش هيقاتلوا بالشراسة دي
ويناضلوا بالقوة دي لتحطيم الديمقراطية وتحدى ارادة الشعب لمحاولات الغاء
الاستفتاء الرائع الذي تم
وتحويل 77% من المصريين الى قطيع من الانعام والبغال والحمير يسوقونهم لتغيير
العقد المتفق عليه بين الشعب والمجلس العسكري
ولتغيير الترتيب الذي ارتضاه الناس
بعمل انتخابات المجلس ثم الجمعية التأسيسية ثم انتخابات الرئاسة

لو الاخوان مش موجودين
مكنش حد قدر يستهف الشعب ويستهتر
برأيه بالطريقة المهينة دي

وكوووول ده عشان الاخوان ميستولوش
عالمجلس بالانتخابات النزيهة
الله يخرب بيتك يا ست نزيهة
كنا عمالين ندور عليكي أيام اللى ما
يتسمى
ودلوقتى عاوزين يرموكي في الشارع مع
14 مليون ورقة نعم في الاستفتاء

لو الاخوان مش موجودين كنا اترحمنا
من أحزاب الفلوس اللى كل شوية تظهر في مدة قصيرة جدا
واللى كل الهدف منها عمل شوشرة
وهيصة للغلوشة على حزب الاخوان

لو الاخوان مش موجودين كانوا أحزاب
المعارضة اتفرغوا لبعض وقطعوا بعض وفضحوا بعض
لكن وجود تكتل شعبي كبير كالاخوان
أجبرهم على التعاون والتلاحم في مواجهة من سيأكل منهم الانتخابات القادمة

الاخوان همه السبب في عدم الامان
والنشاط الزائد لفلول الوطني وأمن الدولة
لأن البلد لو فيها أمان وهدوء يبقى
الانتخابات هتتعمل في معادها
وهيحصل اللى خايفين منه وهايكلوها
الاخوان بصناديق شفافة نظيفة وكنا هنشوف الست نزيهة اللى مش عارفين راحت فين؟؟

الاخوان همه السبب في المؤتمرات
الكتير اللى غرقنا فيها
اشي مؤتمرات شعبية ومؤتمرات قومية
ومؤتمرات وطنية ومؤتمرات برعاية المجلس العسكري وبرعاية الحكومة ...و...و....
وكووووول ده علشان يخلوا الدستور
قبل الانتخابات
طب ما كان من الاول
ما كنتى تخليه يمسكها يا فوزية
وخلصنا
معملتوش كده ليه قبل الاستفتاء

فاكرة كويس ان بعد التنحي كان فيه رأى بيقول في ميدان التحرير ان الدستور يتكتب
هناك في الميدان

طيب انتوا قلتوا مينفعش.... وبعدها
عملتوا استفتاء.. وقلتوا هترضوا وتوافقوا على رأى الشعب مهما كان
ولما الشعب قال كلمته
قلتوا ان الاخوان اللى مملينه
ومبصمينه (أصل الشعب أمي وجاهل)

شفتوا يا اخوان
أغلب الشعب اتهزأ بسببكوا
دا غير المصيبة الكبيرة
المعونة الامريكية المشروطة
والتهديدات الاسرائيلية
لو مفيش اخوان

سهل التفاهم مع أى اتجاه آخر يمسك
البلد
ونهدي اسرائيل ونراضي ماما أمريكا
وناخد المعونة ونتشبرأ بيها

يعنى الاخوان حلهم الوحيد هو حلهم
عشان نرتاح كلنا وننبسط
أو على الاقل حظرهم

عشان تنتهي الفتنة الطائفية
ويهدا بقى فلول الوطني وأمن الدولة
وترجع نقابة المهندسين للمهندسين
ويتعمل اتحاد للعمال
وترجع المعونة الامريكية ونبقى
حبايب سوا سوا مع اسرائيل
وأى حد يحكم... مش مشكلة مين
ان شالله يحيي الجمل اللى محدش قادر
يزحزحه ابدا ولا حتى ميدان التحرير

وابقى سلملي عالديمقراطية أم وشين
ويجعله عامر

طبعا منقول

انا مليش في الكلام ده
[/size]

شكـرا جزيلا على هـــذا المـــوضوع الــرائع والمميز
الذي يستحق كل التقدير